جہاد اور انقلاب

قرآن کا مقصد عالمگیر انقلاب برپا کرناتھا۔ آج بھی قرآن کو ماننے والوں کافرض ہے کہ وہ اپنا نصب العین عالمگیر انقلاب کو بنائیں۔ انقلاب کے معنی توڑ پھوڑنا، قتل وغارت اور تخریب لے لیے جاتے ہیں، جیسے جہاد کے مفہوم کو محدود کرنے کی کوشش کی گئی ہے کہ صرف تیغ آزمائی کو کوشش سمجھا جاتاہے۔ قرآن وحدیث میں جہاد بہت وسیع اور جامع معنوں میں استعمال ہوا ہے۔ لغت کے لحاظ سے جہاد سے زیادہ "کوشش" کے کوئی معنی نہیں رکھتا۔ جہاد تلوار سے بھی ہو تا ہے مگر قلم سے، زبان سے، دل سے اور اکثر تو خود اپنے نفس سے بھی پڑتا ہے۔ اسلام کی تعلیم اور شاہ صاحب کے عقیدے کے مطابق جہاد کامل مقدس فرض ہے، جسے ایک پارٹی ہی انجام دے سکتی ہے، جس کی تربیت خاص مقاصد کے لیے خاص طور پرکی گئی ہو، جس کا ہر کارکن ذاتی اغراض کوترک کرکے اپنی ذات کے اعلیٰ مقاصد کی تکمیل کے لیے اپنی زندگی وقف کر چکا ہو۔ یعنی جہاد صرف تیغ آزمائی نہیں ہے اور نہ ہی انقلاب محض تخریب کا دوسرا نام ہے۔ منفی خیالات پیش کرنا انقلابی کام نہیں ہے، بلکہ وہ فرسودہ نظام حیات کی جگہ ایک نیا بہتر اور جاندار نظام پیش کرتا ہے۔